WAHM Reflections

Ang Kinabuhi: Ang Akong Mga Kagahapon ug Mga Pamalandong Karon

WARNING: LONG BISAYA POST AHEAD! Sa atong pagkahimugso ning kalibutana, gikaluhaan na tang daan sa mga suliran… Atik lang!

‘Di ta anang linya sa radyo ni Doktora Lourders Rosaroso kay memorays na nato na. Kaning ako, mahitungod ra ni sa mga butang nga nagasamok sa akong huna huna karong mga orasa. Unsaon nga mao pay pagtuwak sa ulan. Perpek tayming kaayo sa ilang gitawag kuno nga “bed weather” pero ang tinood, katapol ra jud ni tungod sa panahon. Naa ko diri sa kwarto kauban akong anak. Ug samtang nagsige syag duwa ug hugaw hugaw aning claydoh, ambot kinsa bay nag imbento aning butanga…ako, naglingkod diri sa akong gamayng lamesa. Naghuna huna sa among kinabuhi (nagsugod na lagi ang panahon sa ting-ulan maong nagsugod napud ang panahon sa tingtamad). Lain pay ato, samtang ako nagpamalandong aning butang nga gitawag ug “kinabuhi”, dili nako malikayan nga isipon ang mga kagahapon. Atong mga panahon nga bata pa mi. Diin malipayon kami nga mangaligo sa gawas sa balay inig bunok sa ulan – wa miy labot ug unsa pa man kahugaw sa yuta ug hitak kay lingaw ra kaayo mi.

Daghang panahon nga mag-away ming magsoon sa among sud-an nga usa ka paketeng Milo kay kaming upat gusto nga makasuwa ug kan-on nga naay Milo man lagi. Mao ni ang da best nga sud-an para namo sauna. Panahon sa ting-ani sa humay, maningkamot mi nga maka-pangulun-ulon aron makatigom ug baynte pesos ba kaha ron sa tulo ka kilong humay nga among natigom. Simple nga kinabuhi, lisod pero kung akong huna hunaon karon, wala na nako naisip ang kalisod, sanglit ang mga malipayong mga kaagi nalang ang natisok sa akong alimpatakan. Hangtod naabot ang panahon nga High School na ko ug pareho sa kadaghanan, ako nangandoy usab nga makalampos sa pagtuon aron nga makatabang sa pamilya ug maalsa man lang gamay gikan sa among malisod nga kahimtang sa pamilya. Tungod sa kalisod sa kinabuhi, wala nakalampos sa kolehiyo apan gikaluy-an sa Ginoo nakakita ug trabaho nga adunay sweldo nga bisan dili ra sobra kadako apan dili ra pud sobra ka gamay. Taysa kay murag di na ko kasugakod! Usa… Duha… Tulo… Ok sige, balik ta! Niabot ang panahon nga nahigugma, nagminyo, namabdos ug nagkapamilya. Karon natagamtaman ang kalisod nga nasinati sa akong mga ginikanan karon nga usa napud ako ka inahan. Tungod sa mga pangandoy nga mag-asawa, nahuna-hunaan nga magsakripisyo ang usa sa laing nasod aron nga makatigom ug mahatagan ang pamilya ug maayong kaugmaon. Kalooy sa Diyos, padayon nga nakigbisog kining among gamayng pamilya aron nga ugma damlag, hinaot pa, magkahiusa ug dili na kinahanglan nga magkalayo pa. Apan kani ang mga butang nga nagadagan sa akong huna huna (ambot nganong mudagan gyud nga pwede man unta mubaktas): -Una: Adunay mga panahon nga tungod sa sobra natong hunahuna sa kaugmaon, nakalimtan na nato ang karon. Adunay daghang mga anak nga gipangmingaw sa hawk ug gakos sa ilang ginikanan tungod kay tua sila sa layo. Maingon man ang mga ginikanan nga andam isakripisyo ang kamingaw aron lamang mahatagan ug maayong kaugmaon ang ilang mga anak. Masubo nga pamalandungon apan kani kumon kanatong mga Pilipino. -Ikaduha: Unsa man diay gyud ang timailhan sa gitawag nga “success?” Sa panahon nato karon, alang sa kadaghanan, ang success nakabase sa kung pila ka sakyanan ang imong gipanag-iyahan o unsa kanindot ang imong panimalay o di ba kaha unsa kadako ang sulod sa imong account sa bangko. Mao ba gyud kini ang timailhan gitawag nga “success”? -Ikatulo: Ang kinabuhi ta niining kalibutana, sanglit ug lumalabay lang. Husto ba nga atong hutdon ang atong oras sa pagpangandam alang atong kaugmaon? Kung dili man, husto ba pud nga dili ta mabalaka sa ugma tungod kay mas importante and karon? -Ikaupat: Kita ba gipanganak lang aron mabuhi, mutrabaho ug mamatay? Unsa pa may laing rason nganong nahimugso kita niining kalibutana? Ikaw na ang akong patubagon kay aron di na ni musamot pa ug kataas ang akong post. Lamdagi ko. 😀 Apan kaning maong post akong pagatapuson pinaagi sa pagsita sa balaang kasulatan sa libro sa Isaias 40:8:

“Ang balili nagakalaya, ang bulak nagakalawos; apan ang pulong sa Dios nagapabilin sa walay katapusan.”

Leave a Reply

Your email address will not be published. Required fields are marked *